النتائج 1 إلى 2 من 2

السياحة في كوريا الجنوبية

رحلتي اليوم وياكم الى كوريا الجنوبية نكدر نسميه بلد العجائب اذا كانت اليابان كوكب مثل ما نسميها نكدر نسمي كوريا الجنوبية النجم اللامع! الانطباع الاول من توصل للمطار بعد النزول

  1. #1
    تاريخ التسجيل
    Mar 2009
    الدولة
    زرع البسمة في وجوهكم الطيبة هي دولتي
    المشاركات
    104,519
    افتراضي السياحة في كوريا الجنوبية




    رحلتي اليوم وياكم الى كوريا الجنوبية نكدر نسميه بلد العجائب اذا كانت اليابان كوكب مثل ما نسميها نكدر نسمي كوريا الجنوبية النجم اللامع!
    الانطباع الاول من توصل للمطار بعد النزول من الطيارة مباشرة اكو فحص طبي وهو عبارة عن اخذ معلومات عن آخر البلدان الي زرتها واذا كنت تحتاج تلقيح لبعض الأمراض أو لا حسب البلدان الي زرتها آخر أسبوعين.!
    بعدها توصل لضابط الجوازات بمجرد ما يسوي سكانر للجواز تشوف كدامك شاشة صغيرة بيه معلومات باللغة العربية للجوازات العربية أو لغة ثانية حسب لغة الزائر للبلد يرحب بيك ويأخذ بصمات الأصابع وصورة وبعدها تطلع من باب زجاجي تشوف كدامك مباشرة شاشة توجهك لرقم المكان الي تستلم منه جنطتك.
    انتظرتنا الدليل السياحي الكورية ورحبت بينا (اهلا وسهلا، سلام عليكم)، وكالت هنيو سيوو يعني مرحبا بالكوري!وبعدها انتقلنا بالباص والطريق من المطار لسنتر سيؤول تقريبا ساعة
    استلمت الغرفة وكان الفندق بشارع ايتاوان نكدر نسميه شارع العرب هناك يعتبروه الشارع الدولي تشوف بيه كل جنسيات العالم ومنهم العرب واكو مطعم عراقي صاحبه كوري والدته عراقية ووالده كوري شاب حباب شكله كوري بس من تكعد يكلك مساكم الله بالخير!!
    وتوجد بهاي المنطقة هواية مطاعم تركية، باكستانية ، هندية وكلها حلال ، واسعارها مناسبة جدا
    رجعنا للفندق الي كلشي بيه ع الريمونت كونترول حتى الحمام ينرادلك كتلوك حتى تعرف تستخدم الحمام هههههه
    وفعلا مخلين تعليمات لاستخدامه باللغة الكورية والإنكليزية.
    اليوم الثاني بوفيه الفطور غني جدا كلشي موجود بيه يعني بوفيه انترناشيونال يكدر ياكل بيه العربي والياباني والهندي والاوربي، صعدنا للباص ورحنا لمدينة ايفرلاند يعني دزني لاند كوريا مدينة لا توصف بكتابة فيها الالعاب وحديقة حيوانات وحتى رحلات سفاري كأنك بافريقيا وبيها العاب بتطور الكتروني 9 دي يعني صوت ومي وهوا وصورة المهم من تدخل بيها تصير انت بطل الفلم وتعيش مغامرة أكثر من حقيقية ، أما سكة الموت فهي لأصحاب القلوب الميتة مو القوية والعجيب بالموضوع الدور بيها ياخذ تقريب الساعة حتى يوصل السرة، سكة الموت ثلاث ارباع الوقت مكلوب وتفتر بيك يمكن بسرعة 300 كيلو متر ، المهم شفتها بس ودخت بدون ما اجربها ...
    بعدين وادي السفاري تعيش بيها رحلة لأفريقيا بكل حيوانتها المفترسة والاليفة بس الفرق انه انت اباص وقريبة الحيوانات المدربة منك تشوف دب يلعب سلة!!!! طبعا حقيقة هذا الكلام،، أو قرد يركص، أو طير يجي للباص ويرجع وحده للقفص، ، حتى الحيوانات عدهم عجيبة غريبة.. قمة الروعة والجمال والرقي في التدريب، ،،
    أما الكرنفالات الي تقام هناك وتجي بيها فرق من كثير بلدان مثل أوربا وروسيا وآسيا تخليك تحس انك شفت كل مهرجانات العالم بمكان واحد،، فعاليات في هذا المكان اقل ما يقال عنها أنها معجزة، ،
    طبعا المكان من ابداعات شركة سامسونك وهو ملك الها وتكلفة الدخول للشخص الواحد تقريبا 50$ دولار تشمل الدخول للمدينة وكافة الفعاليات والالعاب الي بالمدينة .
    و باجر اكمل وياكم باقي ايام السفرة لان ينراد الها عشرين صفحة وهسه تعبت ههههه
    اتركم ويا مجموعة من الصور

    السياحة في كوريا الجنوبية 47138268_10156284662


    السياحة في كوريا الجنوبية 47013655_10156284662


    السياحة في كوريا الجنوبية 47106546_10156284662


    المواضيع المتشابهه:


    hgsdhpm td ;,vdh hg[k,fdm Nov H;ev Hlh hfhw h[vfih hvfhu hgfg]hk hgplhl hgpd,hkhj hg]o,g hgsthvd hguhf hguhgl hguvf hguvfdm hgtvr hgtgl hg;jv,kd hg;,vdm hgl]vfm hgltjvsm hgl;hk hglil hgl,j hgih hg,rj hgn hgd hgdhfhk hgd,l hkj hki fhggym fj',v f],k fsvum f'g fu]dk f;g f,tdi fd; fdi fdih j]og ja,t jwdv juda jrvdfh j,wg []h pjn psf prdrm pd,hkjih vpgm .vjih s;m sgm aham atjih w,j 'fuh ;hkj ;]hl; ;gad ;,vd ;,;f ;dg, gHtvdrdh gym ggfhw lfhavm ljv leg lug,lhj lyhlvm l;g,f lk; ksldi k;]v i`h ikh; ,h]d ,hghgdtm ,fdih ,juda ,jtjv ,]oj ,w,vm ,rvdfm ,ld ,i, ,i,h ,dh;l dho` dukd dguf dl;k



  2. #2
    تاريخ التسجيل
    Mar 2009
    الدولة
    زرع البسمة في وجوهكم الطيبة هي دولتي
    المشاركات
    104,519
    افتراضي رد: السياحة في كوريا الجنوبية
    حبايبي اليوم راح اكمل وياكم الجزء الثاني لرحلتي الى بلد العجائب كوريا الجنوبية،، بعد ما كملنا اليوم الأول والثاني ،، باليوم الثالث بعد الفطور بالفندق توجهنا بجولة في مدينة سيؤول تشمل: البيت الازرق- مكان أقامة رئيس البلاد- وهو بناء تقليدي كوري يتميز عن البناء الياباني والصيني انه سقوف البيوت والقصور الكورية تكون مقوسة للاعلى هناك تشوف الحرس الخاص بالقصر من نساء ورجال واگفين مثل التماثيل وبعضهم يوجه السيارات بالمرور أو التوقف بس من يشوفون باص بيه سواح يخلون اله الأفضلية بالمرور والدليل السياحي قالت التصوير ممنوع بس احنا ما قصرنا بالصور ههههه قريب جدا منه قصر جيونغبوك قصر مشيد على مساحة كبيرة جدا من الأرض بيه مجموعة من القصور أكبرهم هو قصر الامبراطور يوميا الساعة ١٠ الصبح يبدي استعراض هو محاكاة للحقيقة في وقت الامبراطور قبل كم مية سنة يعني نفس الملابس للحرس الإمبراطوري نفس دقات الطبول وهو تبديل الحرس الإمبراطوري الي يتبدل يوميا صباحا صدك تحس انه الامبراطور وحرسه منظمين بشكل مخيف وعظيم بنفس الوقت ، بعد الاستعراض تكدر تاخذ صور لقصر الامبراطور وقصر زوجة الامبراطور الأولى وقصور صغيرة لزوجات الامبراطور الباقيات ،بس تبقى الحضوة للزوجة الأولى من خلال القصر والتعامل الإمبراطوري لأنه هي ام الامبراطور القادم ، الحلو بالموضوع الكوريين عدهم اعتزاز كبير جدا بتاريخهم وحضارتهم لذلك تشوف النساء ترتدي الزي الشعبي التقليدي والرجال كذلك بعضهم مشتريها والبعض مأجرها من محلات قريبة من القصر يعني تأجرها كم ساعة ب ٢٠$ تقريبا لو تشتريها من ١٠٠ الى ٢٠٠$ وبعض من الي ويانا اشتروا هدايا من هاي الملابس ، بنفس مكان القصر موجود متحف الثراث الوطني هي قصة وتاريخ كوريا بتماثيل وصور وفيديوهات الي جذبني بالموضوع الصور موجودة باطارات تتغير بيها الصور يعني لوحة بس بالحقيقة هي فيديو متحرك , و قصر جيونغبوك موجود في سنتر مدينة سيؤول وهو واحد من خمسة قصور أخرى تعود لحقبة جوسون , تم بناءه في عام 1394م
    طبعا اعيد بناء هذا القصر لانه تم احراقه خلال الغزو الياباني لكوريا سنة 1592 ميلادية وتم ترميمه عام 1867 ميلادية.
    بعدها توجهنا للقرية التراثية يعني البيوت القديمة الكورية من الاسم قرية تمنيت مدن بلدنا تصير كلها بيوت كورية من فخامة التنظيم ،،
    وبالمساء رحنا لمنطقة ايتاوان الي ما تنام،، كوفي شوبات، مطاعم ، نوادي، وحياة تدل على حيوية هذا الشعب وحبه للحياة.
    اليوم الرابع: كان كوري تقليدي وهو زيارة قرية تراثية تشوف بيها طبيعة الحياة قبل مئات السنين وحتى آلاف السنين بس بنسخة طبق الأصل الحلو بهذا المكان الاستعراضات والرقص الكوري، ناس تمشي على حبال معلقة بالهواء، ناس يسوون عروض تايكوندو، يعني تشوف اكشن بس حقيقي عدهم خفة يطير مترين بالهواء وهو وزنه ما يتجاوز ال ٥٠ كيلو بس يكسر كاشي وحجارمال نص بيت ههههه.
    وبهذا المكان يمثلون المسلسلات التاريخية الكورية الي تشوفوها بالدراما الكورية بالتلفزيون.
    قبل المغرب راحة ساعتين ومساءاً اخذونا بجولة إلى منطقة كلكم تعرفوها كانكم ستايل (Gangnam style الاغنية الكورية الشهيرةGangnam كنكام هي الجزء الغني جدا في كوريا عموما وسيؤول خصوصا يسكنها الاغنياء لهذا صاحبنا المطرب الكوري ذكرها لان تمثل حياة البذخ والترف في كوريا ، يعني ابسط سيارة تشوفها هناك هي البورش ، البيوت لا تعليق ، مجمعات سكنية أشبه ما تكون فلل فاخرة ، يعني شقة طابقين بيها حديقة ومسبح ، أغلبها من بناء شركة سامسونك أو هيونداي،،،
    حياة الليل هناك تضاهي منهاتن في نيويورك.

    اليوم الخامس زرنا اطول برج بكوريا وهو برج لوتيه تاور طوله ٥٥٠ متر ، الطوابق السفلية عبارة عن مول وهو الأكبر في كوريا ، اذا نظرت لسقف المول ادوخ من ارتفاعه، الدرج الكهربائي يوصل طوله ٣٠ متر يعني من تصعد لا تباوع وراك، كلشي تلكي بيه ، التكنلوجية بيه تفوق الخيال يعني على سبيل المثال إذا عجبك تشرب قهوة وانت ماشي أو نسكافيه أو اي مشروب حار اكو انسان آلي روبوت تدفع الفلوس اله وهو يحضرلك الكهوة ههههههه انت الي عليك تخلي السكر بس ، احاول لاحقا انزل فيديو اله، تريد تشرب مي اكو أماكن مخصصة لشرب الماء بي ورق صغير تضغطها تصير كلاص مي صغير تخلي بيه المي وترميه بعد الاستخدام، تشوف مكائن تنظيم البيت ، باختصار هاي الأجهزة ادوس الزر وهم يقومون بالواجب، يعني فعلا هم عايشين بزمن يسبقون العالم بسنين بس اتوقع الدعاية عدهم اضعف من اليابان لهذا ما نسمع عنها ،،
    وكثير من الكوريين يقولون بعد 2020 م راح نسبق اليابان حتى بصناعة السيارات اتوقع هذا يصير ،،
    بعد المول رحنا إلى برج سيؤول هو برج اتصالات سابقا وهسه صار معلم سياحي شهير بكوريا يزوره آلاف يوميا ، المصعد تنتظره والانتظار يشتغل فلم ثري دي ثلاثي الأبعاد!! نصعد المصعد نشوف السقف ثلاثي الأبعاد وفيديو بيه فلم يصعدك للمريخ، ،
    توصل فوق البرج بيه منظر بانورامي لكامل مدينة سيؤول ، وقاعدة البرج بيها جسر العشاق لازم تشتري قفل ومفتاح وتكتب اسمك واسم من تحب أو الحروف الأولى و تقفل عليها للحفاظ على هذا الحب للأبد ، هناك تشوف إقفال عربية ، هندية، كورية ، أوربية وقديمة جدا من سنين طويلة يعني اعتقاد انه هذا الجسر فعلا يحفظ هذه العلاقة للأبد ،
    لان تعبت كلش ، راح أختصر آخر جولات سيؤول وهي رحلة ووقت حر في سوق أو شارع ميونك دونك اجمل أسواق كوريا واروعها أشهر شي تلكيه بهذا السوق مستحضرات التجميل ومواد العناية بالبشرة ، بوتكس وقتي!! يعني مستحضر تخليه على التجاعيد تختفي خلال نص دقيقة!! اي نعم بس لمدة ٨ ساعات، تشوفون وجوههم دوم بيه لمعة طلع سببه كريم تخليه بالوجه يخلي الوجه مرمر ابيض ٨ ساعات او اكثر ، احلى شي يتباهون بيه انه اغلب منتجات التجميل هي عضوية وما بيها سايد ايفكت يعني بدون اثار جانبية ،،
    بالإضافة لوجود الماركات الكورية للملابس ، ومنتجات الجينسنغ الاحمر الكوري وهو الأشهر في العالم هذا النبات اله فوائد ينراد مجلد إلا نكملها يستخدمها الكوريين بشكل يومي وهم يعتبروه سبب رئيسي لأعمارهم الطويلة ،،
    ان شاء الله لاحقا اكمل وياكم مدينة بوسان وجزيرة جيجو
    هاي ينراد مخرج سينمائي شاطر يسوي بيها فلم صح حتى تصير كوريا واحدة من أهم الوجهات السياحية في العالم!!!
    هنيوو سيو اصدقائي...










الكلمات الدلالية لهذا الموضوع

من نحن
تم تأسيس عالم المرأة لخدمة المرأة العربية في شتى المجلات و توفير فرص العمل
إنضم لنا
برمجة و إستظافة إبداع للتكنولوجيا الرقمية