صفحة 14 من 14 الأولىالأولى ... 47891011121314
النتائج 66 إلى 67 من 67

السياحة في فيتنام

  1. #66
    تاريخ التسجيل
    Mar 2009
    الدولة
    زرع البسمة في وجوهكم الطيبة هي دولتي
    المشاركات
    90,424
    افتراضي رد: السياحة في فيتنام

    السياحة في فيتنام
    حلة ڤيتنام وننطلق لمنطقة الثانية
    اليوم راح اسولف لكم على قرى موكان چاي وهي مجموعة قرى تابعة مقاطعة ين بي
    طبعاً بعدنا الشمال الغربي من ڤيتنام وهذه كانت محطتي الثانية قبل لا انتقل للشمال الشرقي من البلد

    بعد ما انتهنت جولتنا بساپا وحسب المخطط انطلقنا لمو كان چاي بالباص (كوستر نفرات) وعينكم لا شافات الكوستر هو نفسه لنقل الاشخاص ويشتغل دلڤري يوصل ويستقبل طلبات وساعي بريد ويشتغل حمل حمّل فوق السيارة ليما الله گال بس وعلى طول الطريق الي مسافته 400 كيلومتر تقريباً يمشي ويدگ هورن والناس واگفة لو تسلم لو تستلم
    طبعاً بالبداية انصدمنا من الحالة بعدين عرفنا انه هذا الشي طبيعي بڤيتنام وصار عادي عندنا
    انطلقنا من ساپا بالعشرة الصبح ووصلنا لمو كان چاي تقريباً بالاربعة العصر

    الاجرة من ساپا لمو كان چاي عشر دولارات تقريباً
    الفندق حاجزه مسبقاً وبما انه هي قرى فأكيد الفنادق بسيطة (حالياً ديبنون منتجع خمس نجوم بالمنطقة من المحتمل يخلص السنة الجاية وراح يسوي طفرة بالنسبة للسياحة)
    وصلنا للفندق ارتاحينا وقررنا نطلع وننصدم بشي ثاني انه ماكو سيارات يعني لازم نعتمد على الدراجات النارية
    اجرنا شباب اثنين اتفقنا وياهم يومياً يجونا حسب المخطط والشباب كانوا جداً ملتزمين نگوللهم بالخمسة الفجر يجون عالموعد

    كانوا باليوم ياخذون خمس دولارات اجرة وهم الممنونين على مشوارين نطلع الفجر نصور ونرجع للفندق والعصر يجون من جديد نطلع لقرية ثانية نصور ونرجع بالليل
    ظليت بيها خمس ايام بصراحة المناظر ما ينشبع منها وتعيش تجارب من العمر من تقضي فترة بنص القرى وتطلع على عاداتهم وتقاليدهم وطريقة معيشتهم
    شعب بسيط جداً ومسالم ويرحب بالزوار بس المشكلة ماكو وسيلة تفاهم ما يعرفون انگليزي
    گضيناها گوگل ترانزليت نكتب الهم ونترجم وهم يكتبون ويترجمون او بالاشارات ومن نريد نروح لمكان نراويهم صورة للمكان وهم يعرفوه وياخذونا

    اكثر الاماكن الي استمتعت بيها بڤيتنام لأن الجو كان حلو وساعدنا عالتصوير
    باليوم الخامس انطلقنا لهانوي حتى نتجه للشمال الشرقي من البلد طبعاً ابو الفندق خابر على سايق الكوستر الي عليه السرة واجانا لباب الفندق واخذنا لمدينة ين بي والطريق كان حوالي اربع ساعات ومن عندها صعدنا باص سياحي الى هانوي

    طبعاً كيفنا بالباص السياحي گلنا راح نرتاح وانصدمنا انه حتى الممر الي بالنص خلة طبلات بلاستك وصعد ركاب بقى بس بحضن السايق ما گعد احد
    المهم عدينا الطريق ووصلنا لهانوي المغرب واكيد حاجزين فندق قريب من محطة الباصات مشي وصلنا له لأن ثاني يوم الصبح لازم ننطلق برحلة للشمال الشرقي من البلد وهذا راح يكون المنشور القادم




  2. #67
    تاريخ التسجيل
    Mar 2009
    الدولة
    زرع البسمة في وجوهكم الطيبة هي دولتي
    المشاركات
    90,424
    افتراضي رد: السياحة في فيتنام
    السياحة في فيتنام
    نكمل وياكم رحلتي بڤيتنام وننطلق للشمال الشرقي من ڤيتنام
    اخر شي وصلنا بالجزء الثاني من السلسلة الى هانوي قادمين من مو كان چاي بتنا ليلة بفندق مباشرة جنب محطة الباصات بحيث تمشينا له واكيد محجوز مسبقاً
    وثاني يوم الصبح انطلقنا الى مدينة لانگ سون من محطة باصات هانوي
    طبعاً السيارة كانت ١١ راكب فكانت نوعاً ما مريحة والطريق كان حوالي ٣ ساعات سهلة ووصلنا الى محطة باصات لانگ سون وركبنا بكوستر مرة ثانية ونفس مهزلة الدلڤري على طول الطريق وبعد ساعتين وصلنا باكسون
    بصراحة جمال المنظر لا يقاوم
    تكوين جبال عجيب والقرية صايرة بالسهل بين الجبال وعلى امتداد البصر مزارع رز واكيد حاجزين الفندق اون لاين وهي بيها اربع او خمس فنادق بسيطة فقط
    المشكلة الي منعتني من التصوير هي المطر من يوم ما وصلنا الى يوم تركناها مطر وقوي والي شايف جنوب شرق اسيا يعرف شنو معنى مطر قوي هنا

    ظلينا بيها ٣ ايام وليلتين
    اول يوم خلاص جايين من سفر ومطر قررنا نبقى بالفندق
    ثاني يوم على اساس نطلع بالخمسة الفجر نتسلق الجبل حتى نصور المشهد الي تشوفوه بالصور بس گعدنا لكيناها تمطر رجعنا نمنا وبالعشرة وگف المطر قررنا نصعد حتى لو بس نتمتع بالمنظر من فوق واخذنا دليل طلب من عندنا ٣٠ دولار مقابل يوصلنا ويصعدنا ويرجعنا واكيد على دراجة نارية
    رحنا للجبل والا ننصدم بطريق صعود مخيف جداً
    عبارة عن صخور ملسة جداً ومرصوفة بشكل منحدر اقرب للقائم من المائل وبسبب المطر والطين والسيول حتى مع حذاء خاص للتسلق كانت رجلنا تزلحگ
    المهم قررنا نصعد لأن احنة جايين لهذا الغرض والصعود للقمة يحتاج ساعين تقريباً صعدنا اول ساعة لنص المسافة والامور كلما جاي اصعب والاصعب بدت تمطر
    وصلنا مكان خلاص لازم نصعد بحبال فهنا قررت انسحب وما اكمل الصعود لأن خطر ومطر واعرف ما راح احصل الشي الي اريده فماكو داعي للمجازفة
    للعلم كل هذا وكل واحد من عندنا شايل جنطة معدات تصوير بظهره وزنها تقريبا ١٢ كيلو وتخيلوا الوضع

    قررت انزل والنزول كان اصعد من الصعود بحيث اضطريت انزل گعود لأن لو انزل بشكل طبيعي احتمال كبير اتزحلك والله اعلم لو يلگوني بنص الغابات لو لا
    كانت تجربة فاشلة انقرهنا لأن ما حصلنا الي نريده رجعنا للفندق وانتظرنا لثاني يوم الفجر كلنا نطلع نصور من الگاع ماكو داعي نصعد لأن المناظر حلوة ايضاً واكيد كعدنا الفجر لگيناها مطر فخلص قررنا نرجع بباص الساعة 8 بدل ساعة 11
    رجعنا للانگ سون ووصلنا بالعشرة وصعدنا من نفس المحطة بباص ثاني الى مدينة كاو بانگ على حدود الصين حتى نصور شلال بان جيوك الي يعتبر واحد من اجمل ٢٥ شلال على مستوى العالم
    وصلنا المدينة العصر وحاجزين فندق اخذنا تكسي للفندق واتفقنا وية التكسي ثاني يوم يجينا الصبح حتى نروح للشلال وطلب مبلغ ٤٠ دولار مقابل الذهاب والعودة
    الطريق من المدينة للشلال ساعة وربع والمناظر اكيد منعشة وحلوة على طول الطريق لكن هدفنا الشلال
    وصلنا للشلال نريد نعبر للضفة الثانية لأن الصور الحلوة تكون من الضفة الثانية للنهر وانصدمنا بكلمة ممنوع
    ليش ممنوع لأن الضفة الثانية هي الصين. يعني النهر عرضة 164 متر 82 منه بڤيتنام و 82 بالصين وهذه كانت صدمة كبرى لأن اني قاري حوالي عشر مقالات من مصورين عن هذا الشلال وحد ذاكر انه نصه بالصين ولا احد ذاكر انه الصور من الجانب الصيني مو الڤيتنامي
    والمشكلة الثانية قبلها بكم يوم كان مطر قوي فتدفق الماء قوي جداً وكل طين بسبب السيول

    فرجعنا خائبين لكاو بانگ وكنا حاجزين على باص ال 3 العصر نرجع لهانوي حتى ننطلق للجنوب برحلة طولت تسع ساعات نزلنا عند محطة القطارات مباشرة ومنها اجرنا كابينة بالقطار برحلة يوم ونص بالقطار 38 ساعة بالضبط حتى نوصل مدينة نها ترانگ اول محطة لنا بالجنوب
    الجزء الرابع راح يكون عن رحلتي بجنوب ڤيتنام


صفحة 14 من 14 الأولىالأولى ... 47891011121314


من نحن
تم تأسيس عالم المرأة لخدمة المرأة العربية في شتى المجلات و توفير فرص العمل
إنضم لنا
برمجة و إستظافة إبداع للتكنولوجيا الرقمية