النتائج 1 إلى 5 من 5

تعبت والله تكفون شوروا علي

السلام عليكم ورحمة الله وبركاته الحمد لله على كل حال.. أنا شاب عمري 33 سنه تزوجت قبل 4 سنوات وزوجتي عمرها الآن 29 سنه عندنا

  1. #1
    الصورة الرمزية ضاق الكون
    ضاق الكون غير متواجد حالياً ام ريناد ومازن
    تاريخ التسجيل
    Aug 2016
    المشاركات
    1

    افتراضي تعبت والله تكفون شوروا علي



    السلام عليكم ورحمة الله وبركاته

    الحمد لله على كل حال..
    أنا شاب عمري 33 سنه تزوجت قبل 4 سنوات وزوجتي عمرها الآن 29 سنه
    عندنا بنت عمرها سنتين ونص .. زواجنا كان من حب

    في بداية حياتنا الزوجية كنا مثل السمن على العسل .. نحب بعض وصادقين مع بعض ومابيننا أسرار او نخبي شي. وكانت تستقبلني كل يوم بالابتسامه والأحضان.
    أنا عاهدت الله في بداية زواجي أصون زوجت وأسعدها وأحفظها وما أخونها.
    بعلمكم بعض العيوب فيني عشان ما أكون الشخص الكامل والكمال لله سبحانه.
    أنا ماكنت أركب طيارات كنت أتعب واتوتر فكنت أصرف زوجتي اذا جاء طاري السفر ,,, ووضعي المادي كان متوسط بسبب اني دفعت كل فلوسي في الزواج وخذيت فلوس من البنك ،،، وكمان آخر سنه ونص كانت نفسيتي تعبانه شوي بسبب الديون وضغط زوجتي انها تبي تسافر فصرت منفّس اغلب الوقت ومكشّر، ولكن ضغطت على نفسي السنة الماضية وسافرنا لأوروبا.
    زوجتي من البنات اللي ما تبين مشاعرها سواء حب او كره او حزن.
    ماكانت مقصره معاي بالبيت دفعت من راتبها لأشياء كثير ووقفت معاي في مرضي لما تعبت فتره وتحملتني ولما أوصيها على شي ماترفض.
    بس يجيها أوقات تقول انت فقير وانا طفشت من هالوضع وانت ماتسافر وانا ابي اسافر مثل البنات، احيان تقول انت كئيب وتجيب الطفش ! مو عارف وش تبي في حياتها, تقول انا شهادتي اعلى من شهادتك وهالشي ما أحبه فيك مع اني ممتاز في عملي وقاعد أترقى الحمد لله بسبب إثباتي لنفسي.

    اللي صار انه قبل سنه سافرت دبي مع امها واكتشفت لما رجعت انها ركبت بدون إذني في هيليكوبتر سياحيه مع 5 اشخاص و واحد منهم سعودي والسعودي حاسب عنها لأنه كان في مشكله في بطاقتها وبعدين لما رجعت المول سحبت فلوس ورجعتها له. ولما عرفت زعلللت منها مره وبغيت اطلقها واعتذرت اعتذار كبير وسامحتها,
    وقبل كم شهرين عطتني جوالها عشان اكلم منه ، وفتحت السناب حقها لقيتها تضحك وتسولف مع واحد ، ورجعنا للبيت وسألتها منو هالشخص قالت هذي بنت وانكرت انه رجال ،، وبعدها دخلت على الفواتير حق جوالها لقيت رقم مكرر ولما بحثت عنه طلع بإسم رجال. ولما واجهتها اعترفت انه واحد تسولف معاه وانه بينهم ضحك واستهبال فقط ،، انكسرت وانجرحت لأني كنت احبها وهي تشوف حبي لها، ما كنت ارفض لها شي ومتعاون معاها ومتسامح وحنون وماني راعي خرابيط او خراب، كتمت قهري ونزلت ولحقتني واعتذرت وحلفت بالله انه مابينهم شي ،، ولما طابقت الأسماء لقيته نفس الشخص اللي كان معاها بالهيليكوبتر في دبي، جلست معاها جلسه هاديه وتفاهمنا وقالت انها ارسلت له كم صوره عالسناب وانه مايعرف عنها شي وانه ساكن بالرياض ( احنا ساكنين بالدمام ) وقالت ابيك تسامحني بشرط تنسى اللي صار وماتذكرني فيه ولو ماتقدر تنسى وتسامح خلاص نفترق.
    فكرت في عشرتنا وفي بنتي وقلت راح اسامحها .. اليوم اللي بعده جبت لها المصحف وقلت لها احلفي عالمصحف انك ماعاد تكلمينه او تتواصلين معاه او مع غيره .. بالبداية رفضت وقالت لا والمصحف حاجه عظيمه ,, لما شفتها تلف وتدور ركبتها السيارة ورحت نزلتها بيت اهلها ,, وجلست تبكي بالسيارة وانا اسفه ما اقصد شي بس اخاف الحلف يكون شي عظيم علي، المهم نزلتها وقلت ماعاد ابغاك ,, وجلست تحاول تتواصل معاي وتبكي وتترجى .. وقالت راح احلف عالمصحف .. اليوم اللي بعده مريت عليها ورجعتها للبيت وحلفت عالمصحف .. وصلبيت ودعيت ربي يكتب لي الخيره.
    وضغطت على جرحي وقلت خلاص راح احاول انسى ,,
    بعد اسبوعين سافرت مع اهلها إلى جدة وكنا نتواصل مع بعض واحنا مشتاقين لبعض .. وسوالفنا عاديه وكل شي تمام ..
    فجأه ليلة العيد فتحت الأيباد حق بنتي وكان فيها حساب الاسنتقرام حق زوجتي ويفتح آلياً .. فتحت كذا بالصدفه لقيتها كاتبه له عالخاص( نستني ؟ وماترد ؟) ومع السوالف اكتشفت انه معاها بالعمل وانه أعزب واصغر منها ب 3 سنوات تقريبا,
    أنا هنا جتني صدمة بغيت انجلط .. ورفعت السماعه ودقيت عليها قلت لها انتي طالق.
    وللأسف كانت في الحيض ( الدورة الشهرية ) وقالي الشيخ طلاقك غير صحيح لازم تكون في طهر .. خلال هالفترة كانت تدق وترسل وتبكي ,, كانت منهاره تماما واهلها من يدرون طبعا.
    لما رجعوا من السفر جاء ابوها ونزلها عندي بالبيت لانه مايعرف اننا متزاعلين .. ولما دخلت البيت قعدت تبكي وتقول الشيطان تمكن مني وانا اقسم بالله ما احب الا انت ولا ابغى غيرك .. تجاهلتها .. ورحت لأهلي وقلت ابي اطلق زوجتي وامي حلفت ما اطلقها ,, وحرام عليك وبنتك صغيرة وتحتاج لك .. قعدت ادعي ربي وابكي واستخير وقلت باخليها تحلف على نفسها بالأمراض والسرطان لورجعت تكلمه او تتواصل معاه وبالفعل دعت على نفسها ,, هي حالياً ماتقدر تطلع من الشركة اللي هي فيها لانها ماخذه قرض من الشركة وماتطلع الا لما تدفعه. بس حلفت بالله انها خلاص ماعاد تبغي شي من الدنيا غير رضاي.

    أنا تعبت مو قادر انسى .. اتخيل كل شي بينهم ضحكهم وسوالفهم . انام جنبها وهي تضحك مع غيري ,,
    لما سالتها ليش سويتي كذا؟ قالت انه انت كنت مهملني ولا تتغزل فيني واخلاقك قافله طول اليوم ولا تقدر تسفرني مثل البنات لانك ماتحب الطيران وكمان الشيطان لعب على عقلي وضعفت.
    أنا احبها واعشق وجودها في حياتي .. بس حاليا مدري وش الشعور اللي فيني.
    ما احسها نادمه كثير عاللي سوته .. واذا تهاوشنا الحين تقعد تقول من زينك او من زين العيشه معاك .. وفجاه اشوفها ماتبي تبعد عني ..
    أمس تقول انا ماعاد اتحمل فصلاتك .. يوم تبيني ويوم تبي تطلقني ..
    وكأن اللي صار شي سهل! .. طبعا أنا متاكد انه علاقتهم ماتعدت جوال واتصال.

    أفكر اطلقها لأني صرت مشتت معاها ,, لكن كاسره قلبي بنتي الصغيره احبببببها واهلها ناس محترمين جدا جدا ويحبوني ..
    ولو خليتها على ذمتي بقعد أوسوس وافكر بالي صار وراح اتعبها ..
    مدري وش اسوي تكفون شورو علي .. تعبت تعببببت
    أحسها في بعض الاحيان ماصار يفرق معاها لو طلقتها .. مدري وش أسوي

    المواضيع المتشابهه:



  2. #2
    الصورة الرمزية أنثى القوس
    أنثى القوس غير متواجد حالياً مراقبة الاقسام الادبية
    تاريخ التسجيل
    Apr 2012
    الدولة
    تحت سماء تُمطر ثلجاً ☔
    المشاركات
    6,493

    افتراضي رد: تعبت والله تكفون شوروا علي

    والله افضل حل انك تطلقها لأن زوجتك كثير غلطت وانت كثير سامحتها


  3. #3
    الصورة الرمزية نورسين ضوء القمر
    نورسين ضوء القمر غير متواجد حالياً مشــرفة القسم العام
    تاريخ التسجيل
    May 2016
    الدولة
    كوكب الزهرة
    المشاركات
    1,873

    افتراضي رد: تعبت والله تكفون شوروا علي

    الله يعينك أخي انت شخص وفي بس الطلاق شي مو سهل فكر كثيرا قبل اتخاذ هذا القرار والله يوفقك راح ادعيلك

    التعديل الأخير تم بواسطة نورسين ضوء القمر ; 10-08-2016 الساعة PM 20:00

  4. #4
    الصورة الرمزية ابن مصر
    ابن مصر غير متواجد حالياً مشــرف قسم الاستشارات و النفسية و الزوجية و الطبية و الاجتماعية
    تاريخ التسجيل
    Nov 2008
    الدولة
    ام الدنيا ومتواجد بالمملكه حاليا
    المشاركات
    4,888

    افتراضي رد: تعبت والله تكفون شوروا علي

    لا حول ولا قوة الا بالله العلي العظيم
    اخى الكريم طلاقها حلك منها لانها تعودت السوالف
    وما راح تتراجع عنها و ممكن تكون سوالف عاديه
    أن كنت تتحمل صداقتها مع رجال أكمل معها والا الطلاق


  5. #5
    الصورة الرمزية برنسز شهد
    برنسز شهد غير متواجد حالياً ام ريناد ومازن
    تاريخ التسجيل
    Aug 2016
    المشاركات
    2

    افتراضي رد: تعبت والله تكفون شوروا علي

    انت اجلس معاها وتفاهم معاها وناقشها وقول لها لازم تتغيري او ما منكمل مع بعض والله يخترلكن الخير


ضوابط المشاركة

  • لا تستطيع إضافة مواضيع جديدة
  • لا تستطيع الرد على المواضيع
  • لا تستطيع إرفاق ملفات
  • لا تستطيع تعديل مشاركاتك
  •  
من نحن
تم تأسيس عالم المرأة لخدمة المرأة العربية في شتى المجلات و توفير فرص العمل
إنضم لنا
برمجة و إستظافة إبداع للتكنولوجيا الرقمية

SEO by vBSEO ©2011, Crawlability, Inc.